Şeveknaene be aco newe resnaena kulturê homete sebeta kamiya xo doz kerdene u qimetanê hometa xo fam kerdena ina zaf muhima. Ebe halo de elektronik gurenaişê malumati, yanê malumati digital kerdene nê kar u gurêy kena çhip, vılabiyene dêy kena rehet.
Mefi de Müza Dêsımi derheqê coğrafya Dêsımi de xızmetê de digitale ana hurêndi. Sebeta qorikerdena kulturo ke marê mêras mendo ebe gureo de asae (ze arşiv, kıtabxane, 3D ra nesney) be gureo de sılt (ze zon, itıqat, müzik uçb.) merkezê de zanıke cêna de.
Na müze de dozê tarıxê mıntıqa Dêsımiya ke, tede zobina kultur u itıqata ra isana têlewe de weşiya xo ramıta, êno çarnaene; her cihet ra weşiya hometa Dêsımi cêrina çıma ver. Na müza digitale de wesiqê khan u newey dine are, şevekinê.
Dêsımıcê ke Hardo Dewrêşo khan ra goç gırê do amê Almanya, tarıxê ina ki na müze de caê xo cêno. Guman beno ke na coğrafya Dêsımiya khane ra 450.000 ra zêderi isani na lınge de Almanya de weşiya xo ramenê. Zêderê nina hometa Raa Heqi raê, wertê goçeriyanê Anadoliye de hurinda nina xêlê gırana.
Digital kerdene be amade kerdena kulturo mêras mendey asaişê deo enternasyonal rê ki xızmete kena. Na proja müze de, ebe karo de dokumentar, ebe diyalog be fikriyato de akademik, her het ra alaqa wertê kultur u itıqata sero kar beno. Ebe na proja müza digitale wazenime diyalogê wertê kultura u itıqata bızêdnime.